Duracell

DURACELL
Margir kannast við þessa flugu og eiga hana í boxinu sínu. Ef þú hefur ekki prófað hana er vel þess virði að gefa henni tækifæri.
Margir nota hana sem neðri flugu ef þeir eru að veiða 2 flugur í einu, og gott er að hafa bjarta eða skæra flugu á efri taumenda þegar hún er veidd.
Veldu krókastærð eftir aðstæðum á vörusíðunni.

Hún er skæð í bleikju, sjóbleikju, urriða og það kæmi mér ekkert á óvart ef einn eða tveir laxar hafi fallið fyrir henni.

Krókarnir sem ég nota helst í þessa flugu eru Hanák H460BL Jig Superb RS og Hanák H400BLG Jig Classic Gold ef það á að veiða staðbundna bleikju, en ef það er stefnt að því að veiða stærri og öflugri fiska þá mæli ég með að nota Hanák H490BL Jig Superb Trophy án agnhalds eða Hanák H45XH Jig Trophy, sá síðarnefndi er með örlitlu agnhaldi.
Einnig mæli ég með að nota tungsten-kúlur með rauf fyrir jig-króka eins og Hanák Tungsten bead RS+. Kúlustærðin fer eftir aðstæðum. Því þyngri sem kúlan er, því hraðar sekkur flugan og það er nauðsynlegt í tæknilegri taumaveiði (Euro nymphing) þegar koma á flugunni til fisksins í hröðum og djúpum ám.
Búkurinn, í þessu tilfelli, er Spectra Dubbing nr. 335 og við reynum að hafa búkinn þunnan því ef við hlöðum of miklu döbbi á búkinn þá sekkur flugan ekki eins vel.
Vafningurinn er úr rauðlituðum vír, ég notaði 0.09mm en það er í lagi að nota þykkari vír, það eykur einnig við sökkeiginleika flugunnar. 
Kraginn er brúnn CDC og ég vef aðeins einn til tvo hringi, því of mikið af CDC getur dregið úr sökki flugunnar.
Í lokin setjum við örlítinn frambúk úr döbbi og það má vera hvaða litur sem er, en ef þið viljið gera fluguna meira áberandi þá er tilvalið að setja skæran UV lit í kragann, en annars er í lagi eins og ég gerði að setja sama lit og var notaður í búkinn.
Þegar döbbið er komið á og ef þið eruð að nota annað en svartan þráð, getur verið gott að gera lítinn litapunkt á fluguna með þræði. Þá mæli ég sérstaklega með rauðum eða appelsínugulum þræði. (Ráð: Notaðu hvítan þráð og litaðu hann með tússlit til að fá þann lit sem þú vilt.)
Klárum svo fluguna með að gera lokahnút og bera örlítið lakk á til að gera fluguna sterkari og endingabetri. 

Ef þú hnýtir þessa flugu, eða aðrar flugur sem þú vilt sýna okkur, þá máttu endilega senda okkur mynd af afrakstrinum á Instagram, Facebook eða tölvupósti.

Efnislisti
DURACELL

Hnýtingarefni

Krókur: Hanák H460BL 
Kúla: Hanák RS tungsten bead
Þráður: Hends Nanothread 12/0 svartur, eða rauður fyrir litapunkt
Skott: Hends CDL 
Vafningur: Hends color wire 0.09mm Red
Búkur: Hends Spectra dub no335 Dk.Brown 
Kragi: Hends CDC Natural Brown 08  
Frambúkur: Hends Spectra dub no335 Dk.Brown